معلومات مشهورة اثبتت علميا بأنها خرافات
الفطور أهم وجبه
الكمية اللي تاكلونها باليوم كله أهم من اي وجبه
أهم وجبه اللي تثبتكم على الاستمراريه
الفطور المبكر ينشط او يشغل الايض
معلومه قديمه ولله الحمد طلعت خزعبلات
الايض شغال ٢٤ ساعه حتى لو ما تاكلون شي
اللي متعود ياكل مبچر عليه بالعافيه واللي يحب ينطر فتره طويله بعد الاستيقاظ من النوم عليه بالعافيه
اهم شي تاكلون لما تجوعون
لازم تاكلون كل ٢-٣ ساعات لتنشيط عملية الحرق
معلومه قديمه طلعت خربوطه
يواعه ؟ اكلوا
مو يواعه ؟ لا تاكلون
اهم شي تحددون الكمية اللي لازم تاكلونها اثناء اليوم عشان توصلون الى اهدافكم الصحيه والرياضيه
منو اللي يفضل ياكل كل ٣-٤ ساعات ؟ الرياضي اللي يبي يزيد عملية تكوين بروتين العضلات
الصيام لفترة طويله يحرق العضلات
العضلات ما تحترق لو ما كليتوا شي لمدة ٣ ايام
الجسم يحرق الكاربوهايدرات ثم الدهون ثم الاحماض الامينيه اللي تتخزن بالعضلات
و هالعمليه وايد طويلة
أهم وجبه للرياضي اللي بعد التمرين
على حسب شنو كليتوا قبل التمرين
الوجبات الثقيله تغذي عضلاتكم ل٦ ساعات يعني مو ضروري تاكلون شي بعد التمرين اذا مو يواعه
ولكن اللي يتمرن صايم ضروري ياكل وجبه او يشرب بروتين بعد التمرين
الكاربوهايدرات بالليل تسمن لان الكاربوهايدرات مصدر طاقه
هالكلام صحيح ولكن الكاربوهايدرات مصدر انتعاش قبل الطاقه
جسم الانسان فيه اكثر من مخزون طاقه وعشان تستفيدون منهم لازم تترسونهم قبل لا الجسم يستهلكهم
الكاربوهايرات تسمن ؟
اي تسمن اذا فطوركم فطاير ، وجباتكم الخفيفه كاكاو ، غداكم مندي وعشاكم صمونة هارديز مع "عاوز حلقات بصل وكوكي برضو؟"
اذا سعراتكم ، بروتينكم ، دهونكم وكاربوهايدراتكم محسوبه ماكو الا العافيه
مشروبات الدات تسمن
مضره ؟ اكيد اذا كثرتوا منها ، مضره نفس اي صنف اذا كثرتوا منه
كل دراسه شفتها عن الدايت والسمنه مو معتمده لانهم مو مبنيين على ارتباط مباشر نفس الدراسات المعتمده اللي قارنوا بين المشروبات العاديه والدايت واكتشفوا اللي شربوا دايت بدال العادي اكلوا اقل وضعفوا اكثر
انا اشرب مشروبات دايت لان الحرمان مقبرة الرجيم
لان مو واقفه على علبتين دايت باليوم اذا ٨٠٪ من اكلي من مصادر طبيعيه
لان نسبة السمنه بالخليج فوق النخل من كثرة التفلسف عن اضرار مشروبات الدايت بس "اصلا عادي لان الكيكه المتروسه مليون طبقة نوتلا فوقها ايسكريم وعمات عين وايد اصح من هالكيماوي"