١١ مشكلة رمضانية وتفسيرها
١ : ما قدرت تاكل عدل بأول ايام رمضان
التفسير : نمط حياة جديد ، مو متعود تصوم فترة طويلة بدون اكل وماي وانسدت شهيتك على الاكل بسرعه
الشهيه راح ترجع من ثاني اسبوع
٢: خلصت اكل بيتكم بثاني يوم رمضان او بالاسبوع الثاني من رمضان
التفسير : لأنك ما كليت عدل باول ايام رمضان وجسمك يبي منك حاجته
٣: كليت كمية حلو مو طبيعيه
التفسير : قمت من الفطور جوعان وفيك تاكل زياده او كثرت موالح ومقالي على الفطور او ما شربت كمية ماي مناسبه او مارست رياضه كثيفة قبل الفطور أو ما ركزت على أصناف مليئة بالبروتين والالياف والنشويات الصحيه
٤: أداءك في النادي صفر على اقصى الشمال
التفسير : شي جدا طبيعي اذا تمرينك قبل الفطور او اذا مو نايم عدل او مو ماكل عدل
اذا تمرينك بعد الفطور هم شي طبيعي لأن ماشي على نمط حياة جديد واداءك بيرجع بعد اول اسبوع من رمضان
٥: الامساك
التفسير : شرب كمية ماء قليلة ، تناول كمية الياف قليله من الخضروات والفواكه ، تناول كمية اكل صحي قليل ، التركيز على الاكل المقلي والمالح والحالي ، بالاضافه الى صدمة الجهاز الهضمي لما تصوم لعلى الاقل ١٤ ساعه بدون اكل وماي وتصدمه بأكل يومين بنص ساعه
الخروج الطبيعي في رمضان ١-٢ مرات باليوم
٦: العطش
التفسير : كثرة الموالح والاكل الحار / اللاذع ، قلة شرب الماء، قلة تناول مصادر غنية بالبوتاسيوم نفس الخضروات والفواكه، تناول الوجبات السريعه عند السحور [او اي وجبه غنيه بالصوديوم]
٧: الصداع
التفسير : هل انت مدخن ؟ هل انت مدمن كافيين [قهوه ، شاهي، مشروبات طاقه] ؟ تشرب وايد ماي بالايام العاديه وبرمضان مقصر ؟ تاكل كمية سكريات مو طبيعيه ؟ بالضبط
٨: حاشك خمول مو طبيعي لما رحت النادي بعد الفطور
التفسير : هالشي راح يحوشكم اذا كثرتوا اكل على الفطور [يعني دخلتوا بغيبوبة اكل] او اذا تمرنتوا والاكل ما تهضم
تمرنوا بعد على الاقل ساعتين اذا الوجبه ثقيله
٩: وزني برمضان اقل من الأيام العاديه
التفسير : لأنك قست وزنك وانت صايم بدون اكل وبدون ماي
١٠: بولتي [وانتوا بكرامه] وايد غامجه
التفسير : شي طبيعي لان مو قاعد نشرب كمية ماي مناسبه ولكن خطرة على المدى الطويل
كثروا ماي لتجنب أضرار الجفاف
١١: إرهاق وتعب مو طبيعي قبل الفطور بساعتين
التفسير : كل مخازن الطاقه في اجامسنا صفر [او تحت الصفر اذا مارسنا رياضه] بعد على الاقل ١٤ ساعه صيام ، يعني مستويات السكر في الدم منخفضة جدا وضغط الدم بالأرض
لا تجهدون انفسكم وحاولوا تنسدحون وتريحون على ما يأذن