نبدأ بأكبر غلطه : توكلون عيالكم فطور غني بالكاربوهايدرات البسيطه وقليل البروتين والدهون الصحيه
شصير لما عيالكم ياكلون معجبان او كورنفليكس غني بالسكر او توست ابيض مع جبن قلاص [ كاسات ] او عصير [ حتى لو فريش ] قبل المدرسه ؟
اداءهم الدراسي وذاكرتهم صفر على اقصى الشمال .. والمصيبه هالتأثير السلبي يتم معاهم لفترة لا تقل عن يومين
والحل ؟ توكلونهم فطور غني بالكاربوهايدرات المعقده [ غنية بالالياف ] والبروتين والدهون الصحيه
مثل شنو ؟
- بيض مع توست او خبز من القمح الكامل
- جبن طبيعي كامل الدسم [ حلوم ، جبن ابيض ، جبن فرنسي او يوناني ، او اي شرائح جبن طبيعيه - اللبنه ممنوعه لان مافيها نسبة بروتين عاليه ] مع توست او خبز من القمح الكامل
- فول مع توست او خبز من القمح الكامل
- كورن فلكيس غني بالياف [ لازم تبحثون عن نوعية معتمده ] مع حليب كامل الدسم
- روب [ زبادي ] كامل الدسم مع كوب موسلي [ Muesli ]
- شابورة من القمح الكامل مع حليب كامل الدسم وملعقة عسل طبيعي
- لبن كامل الدسم وقطعة فاكهه او رطب
- شوفان مع حليب كامل الدسم وملعقه عسل وقرفه [ دارسين ]
- ديك رومي [ تيركي ] او روست بيف مع شريحة جبن كامل الدسم وتوست او خبز من القمح الكامل
- ملعقتين بينت بتر [ زبدة الفول السوداني ] مع توست او خبز من القمح الكامل
واللي ما يحبون التوست او الخبز من القمح الكامل ؟
- شركة لوزين السعوديه عندهم توست أبيض ولكن بفوائد توست البر اسمه المتكامل
- خبز ايراني بدال خبز ابيض
وشنو ياكلون بالمدرسه ؟
اولا حرصوا انهم يبتعدون عن المعجنات نفس البيتزا والفطاير
ثانيا عطوهم فاكهه بدال عصير او فاكهه مخلوطة
ثالثا عطوهم مكسرات نيه ، محمصه او مدخنه [ الفوائد نفس الشي ] لسد الشهيه وتعزيز الذاكرة
ثالثا لا تعطونهم فلوس عشان يشتورن وجبات سريعه من المقصف او خرابيط من البقاله
رابعا عطوهم ملعقه صغيره من اي عسل طبيعي مع ماي فاتر الصبح على الريج او اي وقت قبل الفطور لتعزيز طاقتهم الجسدية والذهنيه
خامسا لا تفطرونهم اذا مو يواعه بس عطوهم فطور عشان ياكلونه بالمدرسه بدال لا يخربطون
سادسا سألوهم شنو مشتهين ياكلون وحضروا لهم بدائل صحيه