عدم أهمية مواعيد الوجبات
اليوم بنتكلم عن عقده ثانيه مسببة ازمه لبعض المتابعين
الالتزام بمواعيد الوجبات
مثال رقم ١ :
نفرض عندكم وجبه الساعه ١٢ الظهر ولكن مرتبطين بإجتماع لمدة ساعتين
شراح يصير بالجسم اذا ما كليتوا وجبة الساعه ١٢ ؟ ولا شي ، ماراح تحرقون عضلاتكم ولا تبطؤون عملية الحرق
احتمال الجوع يزيد لانكم معودين الجسم على تناول وجبه الساعه ١٢ يوميا
مثال رقم ٢ اللي متعلق بمثال رقم ١ :
لازم تاكلون الساعه ١٢ عشان تاكلون مره ثانيه الساعه ٣ عشان تمارسون رياضتكم الساعه ٦
تأخير الوجبات يسبب تأخير التمرين ، وانتوا ما تبون هالشي لان وراكم التزام بالليل
والحل ؟ دمج وجبة الساعه ١٢ مع الساعه ٣
الكمية كبيره ولكن الجسم بيستفيد منها ؟ اكيد بس الهضم أبطأ بشوي
الجسم بيمتص البروتين والدهون والكاربوهايدرات في هالوجبه الكبيره
مثال رقم ٣ :
اوقات الجوع عندكم تختلف عن الناس لاسباب شخصيه [ظروف الشغل ، ضغوط الحياة اليوميه والخ]
استحاله تاكلون ٤-٦ وجبات باليوم مثل ما حرص اخصائي التغذيه
والحل ؟
تعرفون سعراتكم ؟ ممتاز
تعرفون شكثر بروتين ، دهون وكاربوهايدرات لازم تاكلون ؟ جميل
توزيعة و اوقات الوجبات مو مهمين كثر كمية ونوع الاكل
هذا مو معناته اللي ياكل اكثر من ٤ وجبات غلطان
هذا معناته الطريقتين صح على حسب نمط حياتكم
أنا [فهد] آكل ٣ وجبات :
وجبه بعد تمرين الصبح ، وجبه خفيفه بعد ٤ ساعات و وجبه ثقيله قبل النوم
ليش اثقل وجبه قبل النوم ؟
١ لان شهيتي كبيره بالليل اكثر من الصبح فأغلب سعراتي على العشاء
٢ لان اتمرن الصبح على معده فاضيه والوجبه تشيلني بالتمرين
الخلاصه
اكلوا على حسب الطريقه اللي تناسب نمط حياتكم لان كل الطرق تؤدي الى روما
الطريقه الصحيحه هي التي تناسب الملتزم
والطريقه الخاطئة هي التي تؤدي الى صعوبة الاستمراريه