القمح وثبات الوزن
عندي ٥ مراجعين [٢ ذكور و٣ اناث بأعمار وأجناس مختلفه] فيهم حساسيه خفيفه من القمح مالها شغل بالقولون او مرض السيلاك [اضطرابات هضميه] ، يعني ولا واحد فيهم يعاني من اعراض خطره من القمح
شلون عرفت هالشي ؟
أول اسبوعين من اي نظام احاول اشيل اصناف وايد ثقيله على جهاز الهضمي نفس الحليب واللحم الاحمر
والمفروض اشيل الخبز بس وايد ناس يعتمدون عليه [وأنا ضد الحرمان]
المهم، لما اوزانهم ثبتت بسرعه [بعد شهر من بداية النظام] شلت كل مصادر القمح الثقيله لمدة اسبوع وبدلتها بمصادر كاربوهايدرات أخرى نفس الرز ، الكينوا ، البطاط والفواكه
يعني السعرات الحراريه نفسها
بعد اسبوع كلهم ضعفوا على الاقل ٢ كيلو [وحده ضعفت قريب ال٤ كيلو]
ليش صار فيهم جذي ؟
عندي دراستين معتمدين يؤيدون و ينكرون هالشي
اكتشفوا ان الغلوتين [بروتين القمح] يأثر على نزول الوزن بنسبة بسيطه من المجتمع
نسبة بسيطه يعني ١٠ من ١٠٠ شخص [نسبة ضئيله]
ولكن النتائج على هال١٠ معبره
ملاحظات مهمه :
١ هالكلام ما يمشي على الناس اللي ياكلون درزن معجنات ويقولون الوزن ثابت من القمح
ولا يمشي على ناس ياكلون كمية اكل مو طبيعيه ويقولون سمنتنا من القمح
٢ لا تشيلون مصادر فيها قمح بدون لا تبدلونها بشي ثاني والا ماراح تعرفون اذا النزول من القمح او من تقليل السعرات الحراريه
٣ القمح يأثر على نزول وصحة الناس اللي يعانون من مشاكل بالقولون
الخلاصه : التجربه خير برهان
ماراح تعرفون اذا شي يضركم او يفيدكم اذا ما شلتوه او ضفتوه