١٢ سبب وراء ثبات الوزن
سؤال ماقدر اجاوب عليه ١٠٠٪ لان ماعرف تفاصيل الانظمة اللي ملتزمين فيها ، ولكن اقدر اساعدكم عشان تصيدون المشكلة :
1. كثرة الاكل باليوم المفتوح
نادر تصير مع البنات لان ما ياكلون الكمية اللي تثبتهم ، بس اشوفها عند الشباب خاصة لاعبين رفع الاثقال
2. حساسية من القمح [خبز ، توست]
منتجات القمح تثبت نسبة بسيطة من المجتمع ؟ لما شلعت التوست والخبز من بعض مراجعيني الضعاف اللي يبون يضعفون زيادة [ادري ما عندهم سالفة] اوزانهم نزلت
3. منتجات الالبان
بالاشارة الى رقم ٢ ، هم اكتشفت الحليب ما يثبت الوزن كثر منتجات القمح
المنتجات المخمرة نفس الروب [زبادي] واللبن ما فيهم شي وانصح فيهم
4. كثرة الالياف وقلة شرب الماء = امساك حاد وانتفاخ مو طبيعي
كثروا ماي [على الاقل ١.٥ لتر باليوم] واكلوا حبتين كيوي باليوم [٨٤ سعره حرارية] او ٣٠ حبة عنب [١٠٠ سعره حرارية]
5. تمارين المقاومة
لعبة الاثقال لعبة شكل قبل الوزن ، يعني اي زيادة بالعضلات تساوي زيادة او ثبات بالوزن
الشكل والمقاسات تتغير للافضل ؟ وايد
الجسم يشد ؟ وايد
الميزان يتحرك ؟ شوية
6. الدورة الشهرية
التقلبات الهرمونية = انتفاخ ، احتباس الماء وشعور "أحس-اني-فقمة"
هذا شي جدا طبيعي ، يعني لا تحاتون لان الآثار مؤقتة
ولا تقيسون الا بعد الدورة
الوزن الزايد اثناء الدورة الشهرية وهمي
7. تناول وجبة كبيرة بالليل وقياس الوزن الصبح
ملتزمين بعدد سعرات لفقدان الوزن و اكبر وجبة تاكلونها بالليل وتقيسون الصبح
وين المشكلة اذا كمية الاكل مناسبة ولكن توزيعة الاكل مخصصة لنمط حياتك ؟ وقت قياس الوزن
لا تقيسون بعد وجبة كبيرة او قيسوا نفس اليوم في نفس الوقت وفي نفس الظروف
تدرون شلون ؟ لا تقيسون خير شر واعتمدوا على قياسات هدومكم ، المنظرة وملاحظات الآخرين
8. حساسية من الجو
غبار وملوثات بالجو
كلهم يساهمون في تهيج كل و اي نوع حساسيه منهم احتباس الماء والانتفاخ
9. الادوية والمكملات الغذائية
بعض الادوية تزيد او تقلل الشهية ، او تساهم في احتباس الماء بالجسم
بعض المكملات [خاصة الاعشاب] تساهم في احتباس الماء بالجسم
10. كثرة الصوديوم وقلة شرب الماء
انا مو ضد الصوديوم بس انا ضد كثرته وعدم شرب الماء للتخلص منه قبل لا يضركم
كثرتة بدون شرب الماء = اضرار مالها نهاية
11. السهر و قلة النوم
خاصة اللي دواماتهم شفتات يعانون من عسر الهضم اللي يسبب امساك حاد ثم الانتفاخ واحتباس الماء
12. القولون العصبي
نفس قصة السهر وقلة النوم
الحل الامثل ؟ لا تاكلون اصناف تهيج القولون وهدوا اعصابكم